مراقبة الإنتخابات - شايفنكم

يعنى ايه مراقبة انتخابات ؟
مراقبة الانتخابات هيه مشاركة فى حماية الانتخابات من اى تجاوزات تحصل من اللى بيدير الانتخابات وبيشرف عليها وكمان من تدخل اى جهة فيها لصالح طرف من الاطراف المرشحة .

ليه حتراقبوا الإنتخابات؟

الإنتخابات في مصر, طول عمرها بتتزور, و أصواتنا بيتلعب فيها, و دي أول إنتخابات المصريين فعلاً عندهم أمل فيها, و لو إتزورت زي كل مرة, الناس حتحبط, و حتقعد في بيتها ثاني, و مش حتروح تنتخب بعد كدة... و علشان كدة, إحنا حنحاسب المزوريين.

فى قانون بيحمى وبينظم مراقبة الانتخابات ؟
أيوة فى اتفاقيات حقوق انسان مصر وافقت عليها وبتعتبر زى القوانين المصرية فى التنفيذ ودى بتحمى وبتدى حق لاى حد بيراقب الانتخابات ومنها اتفاقية اسمها العهد الدولى للحقوق المدنية والسياسية وفيها نص بيدى الحق لاى حد انه يشارك فى مراقبة الانتخابات عن طريق قرارات اللجنة المشرفه على الانتخابات فى اعطاء التاريح للمراقبين وانها تسمح لهم انهم يدخلوا اللجان ويشوفوا طريقة الانتخاب صح زى القانون مابقول وكمان يراقبوا برة اللجنة وساعة نقل الصناديق وحقهم كمان انهم يحضروا ساعة الفرز .

مين من حقه المراقبه ؟
من حق اى حد انه يراقب الانتخابات بشرط انه يكون محايد ويعرف ازاى يراقب ويرصد من غير مبالغة او تهوين ومن خلال جمعية من اللى بيراقبوا الانتخابات ومعاه تصريح من اللجنة المشرفة على الانتخابات اللى مكانها القاهرة .

تصريح المراقبة ازاى بيطلع ؟
تروح تتطوع فى أى جهة حتراقب الانتخابات سواء كانت جمعية اهلية او مركز حقوق انسان او لجنة الحريات بنقابة محامين وتحاول تتدرب ازاى تراقب الانتخابات وبعد كدة تديهم بياناتك والمكان اللى حتراق فيه عشان يقدمولك على طلب تصريح بمراقبة الانتخابات الى حيكون معاك وتحاول تظهره طول فترة المراقبة عشان محدش يضايقك .

طيب انتخابات رئاسة الجمهورية بختتلف عن انتخابات الشعب والشورى ؟
أيوة كل انتخابات ليها قانون بينظمها وكمان الدواير الانتخابية بتبقى مختلفة عن التانية وانتخابات الرئاسة بتكون دوايرها نفس دواير انتخابات مجلس الشعب .

ازاى اشترك فى اى جمعية او منظمة حتراقب الانتخابات ؟
فى منظمات كتيرة بتراقب الانتخابات وكمان من حقك انك تتطوع فى اى جهة احتعلن عن مراقبة الإنتخابات وتطلب منهم التدريب وكمان يطلعولك تصريح بالمراقبة .

هل انتخابات رئاسة الجمهورية فيها مراقبة ؟
اى انتخابات لازم يبقى فيها مراقبة حتى لو اللى بيشرف عليها قضاة لان الإشراف على الانتخابات ومراقبة الانتخابات حاجة تانية واللى بيشرف على الانتخابات ممكن تحصل منه تجاوزات واللى بيراقب بيبلغ بيها بالمستندات الموثقة او بالشهود سواء للجنة العامة للانتخابات فى نفس الدايرة او اللجنة العليا للانتخابات اللى فى القاهرة او النيابة العامة فى المكان التابع ليهاوالابلاغ بيكون لاثبات الحالة .

ايه القانون اللى بينظم انتخابات الرئاسة وايه هيه اللجنه العليا للانتخابات ؟
فى قانون قديم من سنة 2005 بينظم انتخابات الرئاسة وحصل له تعديل من المجلس العسكرى فى 2012 وده بينظم اتخابات رئاسة الجمهورية ازاى وفتح باب الترشيح والشروط ليها وكمان الاشراف على جداول قيد الناخبين والدعاية الانتخابية وعملية الانتخاب اللى هيه التصويت يوم الانتخاب والفرز ومتابعة كافة الانتهاكات والتجاوزات اللى ممكن تحصل من المرشحين او غيرهم فى الانتخابات وده كله بيتم عن طريق لجنة اسمها اللجنا العليا لانتخابات الرئاسة ودى لنة مكونة من خمس قضاة يراسهم رئيس المحكمة الدستورية ودى ليها سلطة اصدار اى قرارات تنم الانتخابات واللجنة دى قراراتها نهائية مينفعشى اطعن عليها فى المحكمة ومفيش رقابة من القضاء على قرارتها وعشان كدة كل المنظمات الحقوقية انتقدت صلاحيتها المفتوحة دون رقابة من المحكمة .

ازاى اراقب يوم التصويت والفرز؟
بعد صدور التصريح ليك بالمراقبة تعرف حتراقب فين وتحدد الدائرة الانتخابية اللى حتراقب فيها وتعرف مكان رئيس اللجنة العامة ال بيشرف مكانه فين ولو فى تليفون ليه تحاول تسجله ويفضل ان تكون بتراقب مع فريق عمل معاك على الأقل واحد يكون متابع تحركاتك عشان لو حصلك مكروه يقدر يبلغ ويتصرف وتحاول تبرز التصريح بتاعك سواء لرجال الشرطة على ابواب اللجان او القاضى المشرف على اللجنة العامة قبل لدخول وتستاذنه فى المراقبة وابداء اى ملاحظات شاهدتها خارج اللجنة وانت داخل .

هل من حقى اقدم بلاغ فى النيابة ؟ 
ايوة من حقك وقانون الاجراءات الجنائية بيدى الحق اى مواطن انه يبلغ عن اى جريمه شافها او حتى عرف وحاول تستعين باى توثيق فى بلاغك لو قدرت .

هل ممكن اتلقى شكوى ولو من المرشحين ؟ 
من حقك تتلقى اى شكوى بخصوص يوم التصويت والفرز ولو حتى من المرشحين وتحاول تتحقق بنفسك من صحة الشكوى او على الاقل تحاول ترشد مقدم الشكوى باللجنة العليا للانتخابات ليقدم شكواه وترصد الشكوى وتسجلها فى ملاحظاتك .

ايه اللى بيحصل بعد نهاية التصويت ؟
لو انتهى معاد التصويت الرسمى ومفيش حد جه القاضى بيعمل محضر بيثبت فيه عدد الناخبين وجه صوت كام واحد وبيثبت اسماء كل اللى حضروا فيه بما فيهم اسماء مندوبين المرشحين وبيتم وضع المحضر فى ظرف وبيتشمع بالشمع الاحمر بالاضافة الى الصندوق بيتم قفله بالشمع الاحمر وبعد كدة بيتم نقله لمكان الفرز وبتحاول تراقب عمليه نقل الصناديق عن طريق سيارات الشرطة اللى بيكون مصاحبها القاضى لحد مكان الفرز وبيكون معاه الموظفين المساعدين .

ايه بيحصل ساعة الفرز ؟ 
اللى بيحصل ساعة الفرز ان القاضى بيستلم اوراق واستمارات للفرز من اللجنة العامة وبيبدأ يعمل فتح محضر للفرز وبيثبت فيه استخراج اوراق الفرز وبيعدهم قبل الفرز وبيقارنهم باللى جم يصوتوا وبعد كدة يبدأ فى فرز الاصوات الصحيحة ولاصوات الباطلة وبعد كدة تبتدى عملية فرز الاصوات الصحيحة ولا يسمح بوجود اى حد داخل الفرز سواء افقط القضاة والموظفين المساعدين ومندوبى المرشحين بتوكيل حضور فرز وكذلك المراقبين . 
ويستمر عمل الفرز حتى الانتهاء وتسليم نتيجة فرز كل صندوق للقاضى وتتم مراقبة عملية الفرز خاصة عند المدون لعمليات التصويت على محضر الفرز وملاحظة عدم تعمده اى اخطاء واشهرها تسجيل اصوات بالخطأ لمرشح بدون حق وأى ملاحظة اثناء الفرز التوجه مباشرة لرئيس اللجنة العامة وتقديم شكوى بذلك .

 

إيه الأرقام المهمة الي لازم تكون معايا؟
124 رقم تلغراف النائب العام 
رقم اللجنة العليا للانتخابات للشكاوى وكذلك رقم الفاكس 
بالاضافة لارقام الخط الساخن لمراقبة الانتخابات ونمرة المنسق التابع له لو حصلك اى مكروه يقدر يبلغ فورا

إزاي ممكن أنضم لكم, و أشترك معاكم؟

ممكن تنضم لينا ببساطة من خلال تسجيل إسمك و بينات أوليه عنك على الموقع بتاعنا, أو من على الرقم الفوري 16951, عشان نعملك توكيل كمراقب, و كمان نقدر نوصلك, يوم الإنتخابات, بس لازم تقولنا قبلها ب24 ساعة على الأقل.

ممكن  الناس تتضايق من الرصد الي انا بعمله دة, و يطردوني برة؟

القانون بيدى الحق لاى مواطن انه يبلغ عن اى جريمه شافها او حتى عرف وحاول تستعين باى توثيق فى بلاغك لو قدرت. لو معاك توكيل حضور الفرز, ممكن تحضر الفرز كمان, و التوكيل ده إحنا حنعمله لو عايز. بس قبلها بيوم, على الأقل.

إيه الي بيحصل بعد ما أرصد الإنتهاكات دى و أقدمها لكم؟

الي بيحصل هو إننا بنبعث بالمعلومات المؤكدة دي بنعمل بيها محاضر, و بنرسلها لوسائل الإعلام عشان يفضحوا التزوير على التلفيزيون.

ينفع أراقب في لجنة غير لجنتي؟

الإنتخابات الرئاسية ملهاش لجان و دوائر مخصصة زي الإنتخابات البرلمانية, لإن الشعب كلة بيصوت على نفس الأشخاص, فممكن تراقب في أي لجنة إنت حتكون قريب منها في أي جزء في مصر.

إيه أنواع الإنتهاكات و التجاوزات الي ممكن أقابلها؟

      التجاوزات اللى بره اللجنة هى :-

1.   تدخل اى جهات حكومية فى مساندة مرشح سواء عن طريق وجود اتوبيسات او سيارات تابعة لجهات حكومية تؤيد مرشح .

2.   وجود دعاية على ابواب اللجنة  او ميكروفونات على سيارات, وتوزيع اوراق دعاية على باب اللجنة, وممارسة اى تاثير على الناخبن, التاثير بالدعاية الدينية او توزيع اموال للمصوتين خارج اللجان .

3.   منع اى حد من الناخببن وله حق التصويت من دخول اللجنة سواءكان المنع من الشرطة او من الغير .

4.   عدم وجود تنظيم لدخول وخروج الناخبين على ابواب اللجنة .

بعد ما ترصد التجاوزات حاول توثقها سواء بالتصوير او اخذ عينه من اشكال الدعاية وبعد كدة تبلغ القاضى رئيس اللجنة جوه بده بالاضافة انك بتدون كل الملاحظات فى ورقة عشان تتواصل مع اللى بيتابعك من الجهة او المؤسسة اللى بتراقب من خلالها بعد الخروج .

 ايه التجاوزات اللى ممكن ارصدها جوه اللجنة يوم التصويت واعمل ايه ؟ 

كل مدرسة فيها عدد من اللجان اكتر من صندوق وقاضى واحد بيشرف على الصناديق وقدام كل صندوق فى موظف بينظم التصويت باللاضافة الى مناديب للمرشحين ان وجد داخل اللجنة .
والتجاوزات هى :-

1.   عدم وجود ستارة للتصويت السرى

2.   مكان القاضى داخل اللجنة لا يسمح له بمراقبة جميع عمليات التصويت فى كافة الصناديق

3.   الدخول للجنة بشكل عشوائى

4.   وجود دعاية داخل اللجنة لاى مرشح

5.   تاثير ى مندوب من مناديب المرشحين عل اى ناخب .

6.   عدم وجود الحبر الفسفوري

7.   ممارسة اى تاثير لاى فرد داخل اللجنة من المشرفين بتوجيهه للتصويت لمرشح من المرشحين

8.   عد فتح اللجنة للتصويت فى المعاد المحدد الثامنة صباحا ومعرفة السبب 

9.   ممارسة اى تسويد لبطاقات التصويت داخل اللجنة والتسويد هوه املاء استمارات التصويت دون وجود مصوتين .

10.  ممارسة اى تزوير لاى بطاقات تصويت داخل اللجنة بعد املائها من الناخب .

11.  لو مفيش حد جه ,القاضى بيعمل محضر بيثبت فيه عدد الناخبين وجه كام صوت, و بيثبت اسماء كل اللى حضروا فيه بما فيهم اسماء مندوبين المرشحين وبيتم وضع المحضر فى ظرف وبيتشمع بالشمع الاحمر بالاضافة الى الصندوق بيتم قفله بالشمع الاحمر

12.  اكتشاف "الورقة الدوارة " والورقة الدوارة عبارة عن استمارة الانتخاب بيكون حصل عليها شخص من داخل اللجنة ولا يضعها فى الصندوق ويقوم بسرقتها والخروج بها خارج اللجنة ثم يقوم بالتصويت فيها لصالح مرشح معين وبعد ذلك يقوم بالاتفاق مع ناخب اخر خارج اللجنة باعطائه الاستمارة والتى تم التصويت فيها لصالح مرشح عشان يدخل االناخب الجديد وياخد استمارة فاضية ويبدلها بالقديمة ويحط الاستمارة المليانة فى الصندوق وياخد الفاضية معاه بره اللجنة ويسلمها للسمار اللى عطهاله عشان السمسار يتاكد انه صوت للى هوه عايزة وكمان عشان ياخد الاستمارة الفاضية ويعيد نفس الموضوع مع الناخبيين التانيين .

13.  "الساقية الدوارة " و ده من أخطر وسائل التزيور, و هي عبارة عن أتوبيس محمل بمصوتين, بيلفوا على اللجان الإنتخابية, و بيتم رصدها برقم الأتوبيس, و تسجيلة عندنا, عشان اللجان تاخذ بالها.

كل الانتهاكات والتجاوزات دي  انت بترصدها لو حسيت ان فى مشكلة حتحصلك لو بلغت القاضى اللى بيشرف بلغ المنسق اللى بتراقب معاه .وتحاول تبلغ اللجنة العليا للانتخابات او تروح تعمل بلاغ فى النيابة باللى حصل خاصة فى حالات تسويد البطاقات او حالات تزوير فى اوراق الانتخاب شفتها .

Follow me on twitter @ahmedhafeztweet